Jurnal haqida
Ilmiy-amaliy tadqiqotlar va innovatsion ishlanmalar rivojlantirilishi hamda ishlab chiqarishni modernizatsiya qilish, texnik va texnologik yangilash jarayonlariga tatbiq etishni ragʻbatlantirish boʻyicha amaliy mexanizmlar yaratish, fan va ishlab chiqarishni yanada mustahkam aloqasini taʼminlash maqsadida, shuningdek ilmiy tadqiqot tashkilotlari hamda real sektor korxonalari oʻrtasida innovatsion hamkorlik aloqalarini oʻrnatish borasida Oʻzbekiston Respublikasi Prezidentining 15.07.08 yildagi PQ-916-sonli “Innovatsion loyihalar va texnologiyalarni ishlab chiqarishga tatbiq etishni ragʻbatlantirish borasidagi qoʻshimcha chora-tadbirlar toʻgʻrisida”gi Qarorida Oliy oʻquv yurtlari oldiga bir qator vazifalar qoʻyilgan.
Ushbu vazifalarni hal etish maqsadida Oʻzbekiston Respublikasi Vazirlar Mahkamasining 11.10.06 yildagi 214-sonli “Oʻzbekiston Respublikasida ommaviy axborot vositalarini davlat roʻyxatidan oʻtkazish tartibini yanada takomillashtirish toʻgʻrisida”gi Qarori har tomonlama oʻrganib chiqildi. Ushbu qarorning birinchi “Umumiy qoidalar” nomli bobining ikkinchi bandida ommaviy axborot vositasi deyilganda ommaviy axborotni davriy tarqatishning doimiy nomga ega boʻlgan hamda bosma tarzda (gazetalar, jurnallar, axborotnomalar, byulletenlar va boshqalar) va (yoki) elektron tarzda (tele-, radio-, video-, kinoxronikal dasturlar, umumfoydalanishdagi telekommunikatsiya tarmoqlaridagi veb-saytlar) olti oyda kamida bir marta nashr etiladigan yoki efirga beriladigan shakli hamda axborotni davriy tarqatishning boshqa shakllari tushuniladi, deb taʼkidlanganligi bois Toshkent davlat iqtisodiyot universitetining “Iqtisodiyot va innovatsion texnologiyalar” nomli ilmiy elektron jurnalini taʼsis etish boʻyicha Ilmiy Kengash qarori qabul qilindi.
Ushbu elektron ilmiy jurnalda mualliflar oʻz maqolalarini sanoat, infratuzilmalar, transport va kommunikatsiya qurilishini innovatsion rivojlantirish, bank-moliya tizimini yanada isloh etish va uning barqarorligini oshirish, uzoq istiqboldagi tarkibiy oʻzgarishlarni davom ettirish va innovatsion iqtisodiyot raqobatbardoshligini yanada oshirishni taʼminlash masalalariga qaratishlari tavsiya etiladi.
Hozirgi kunda ilmiy elektron jurnallar chet elning yetakchi universitetlarida keng joriy qilingan. Axborotlashgan jamiyatning shakllanib borishi bilan umumfoydalanishdagi telekommunikatsiya tarmoqlaridagi veb-saytlar negizida tashkil qilinayotgan elektron ommaviy axborot vositalarining salmogʻi ortib bormoqda. Bu turdagi nashrlarning keng amaliyotga joriy etilishi nafaqat axborotlarni tezkor yetkazib berishni oshiradi, balki qogʻozdan ham samarali foydalanishga olib keladi. Oʻzbekiston Respublikasi Vazirlar Mahkamasining 22.07.10 yildagi 155-sonli “Respublikada qogʻozni tejash va undan ratsional foydalanish boʻyicha qoʻshimcha chora-tadbirlar” haqidagi Qarorida ham boshqaruv tizimi, lokal va tarmoqlararo masalalarni tezkor hal qilish jarayonlarida qogʻozni sarf qilishni kamaytirish borasida axborotkommunikatsiya texnologiyalari keng joriy qilinib borilayotgani taʼkidlab oʻtilgan. Elektron hujjat almashuvi tizimidan amaliyotda keng foydalanishga oʻtilmoqda va davlat hamda tashkilotlarning interaktiv turdagi xizmatlari tarmogʻi kengaymoqda. Boshqaruv jarayonlarining hujjat aylanishida qogʻozni tejash va undan ratsional foydalanish borasida axborot-kommunikatsiya texnologiyalaridan samarali foydalanish vazifasi ushbu qarorda dolzarb qilib keltirilgan.
Nashr qilinayotgan “Iqtisodiyot va innovatsion texnologiyalar” nomli ilimy elektron jurnal OAK Rayosatining 2013-yil 30-dekabrdagi 201/3-son Qarori bilan "Iqtisodiyot fanlari" boʻyicha "Fan doktori ilmiy darajasiga talabgorlarning dissertatsiya ishlari ilmiy natijalari yuzasidan ilmiy maqolalar eʼlon qilinishi lozim boʻlgan respublika ilmiy jurnallari roʻyxati"ga kiritilgan.
Respublikamizning yetuk olimlari va amaliyotchilarining nufuzli ilmiy ishlari natijalari bilan yosh olimlar, katta ilmiy xodim-izlanuvchilar, mustaqil izlanuvchilar va magistrlarni yaqindan tanishtirib borish hamda respublikamizning ijtimoiy-iqtisodiy sohalarida erishilayotgan innovatsion yutuqlarini ommaga tezkorlik bilan yetkazib berish ushbu elektron jurnalning asosiy vazifalaridan hisoblanadi.
Jurnalning Internet axborot tarmogʻidagi manzili "iqtisodiyot.tsue.uz" deb nomlanadi.
